Hemm tliet raġunijiet ewlenin li abbażi tagħhom qiegħda ssir pressjoni kbira favur din it-tassazzjoni, l-aktar mis-Soċjalisti Ewropej. L-ewwel raġuni hija li s-settur finanzjarju f’ħafna pajjiżi mhux intaxxat mill-VAT, kuntrarjament għal setturi oħrajn. Dan iqajjem mill-ewwel il-mistoqsija naturali: għaliex is-settur finanzjarju għandu jkun preferut u ma jkunx intaxxat bħal setturi oħrajn? Dan isir iktar importanti minħabba li wara l-kriżi globali finanzjarja hemm dubji serji kemm huma veru produttivi ċerta attività dubjuża li sseħħ f’dan is-settur. Is-sigriet ta’ taxxa effiċjenti għall-ekonomija hi li jkollha bażi wiesgħa u mifruxa kullimkien.
It-tieni raġuni, u akbar mill-ewwel waħda, ebda settur ieħor, kemm jekk tal-manifattura, kostruzzjoni, servizzi, qatt ma gie salvat milli jfalli, bħalma sar fil-każ tas-settur finanzjarju. Biżżejjed jingħad li għal dan it-tip ta’ salvataġġ l-Istati Membri tal-Unjoni kkommettew €4.6 triljun. U allura l-mistoqsija naturali l-oħra: ma jkunx ġust li jkun hemm tassazzjoni fuq is-settur finanzarju wara li ngħata daqstant għajnuna? Ma’ dan trid tiżdied l-akkuża li finalment il-kriżi finanzjarja ħolquha l-banek infushom. U l-kriżi tad-djun? Kienet isseħħ kieku ma ħarġux dawk il-biljuni mingħand il-gvernijiet biex isostnu lill-banek?
It-tielet raġuni hi li fl-ekonomija tgħallimna li attivitajiet li jkollhom effetti esterni negattivi fuq ħaddieħor, bħat-tniġġiż għandhom ikollhom taxxa speċjali fuqhom. Fil-każ tas-servizzi finanzjarji l-argument hu li dan is-settur jieħu ħafna riskji kbar u bla bżonn għajr biex jirrendi għal min jagħmel din l-attività, speċi ta’ Casino u għalhekk hija ġustifikata taxxa fuqu.
Il-fatt li f’Ġunju li għadda l-KE ħabbret il-proposti tagħha u se tpoġġihom għad-diskussjoni fil-Parlament Ewropew m’għandux jitqies li din hija xi ħaga li welditha l-Kummissjoni. Anzi. Il-Kummissjioni rrappreżentata mill-Kummissarju għat-Tassazzjoni, Dwana, Awditjar u Anti-Frodi, Algridas Semeta, flimkien mal-President tal-Bank Ċentrali Ewropew Jean Claude Trichet, u mal-Fond Monetarju Internazzjonali rrappreżentat dak iż-żmien minn Dominique Strauss-Khan, dejjem tqiesu bħala li jkaxkru saqajhom dwarha. Kienu kontinwament iwissu u jappellaw għall-kawtela għax din tista’ tirrendi ruħha f’xi ħaġa ineffiċjenti u b’riperkussjonijiet xejn sbieħ.
It-tliet protagonisti dehru quddiemna fil-Kumitat ECON u dik kienet l-impressjoni li tawni. Mhux ħekk il-Parlament Ewropew, li dejjem kien qawwi dwarha u favurha.
It-TTF hija tassazzjoni bi storja antika. Kienet suġġerita diversi drabi fil-passat minn ekonomisti internazzjonali. Kien suġġerit li kull transazzjoni finanzjarja internazzjonali tkun intaxxata u globalment it-taxxa miġbura tintuża biex ikun kumbattut il-faqar jew xi kawża oħra. Konna nafuha bħala t-Tobin Tax billi l-arkittettur kien ir-rebbieħ tal-Premju Nobel tal-istess isem, għalkemm il-midja laqqmitha bħala “Robin Hood Tax”, wara l-personaġġ leġġendarju li kien jieħu mingħand is-sinjur biex jgħin lill-fqir.
Wara l-approvazzjoni tar-Rapport Podimata, u konxja mid-dħul finanzjarju li jista’ jkun hemm għall-baġit tal-Unjoni Ewropea minn fonti msejħa “own resources”, il-KE bħal donnha rat id-dawl, kiber l-entużjażmu u ġew il-proposti tal-Kummissarju Algridas Semeta. Dawk xettiċi jqajmu l-mistoqsija jekk l-UE bħala blokk finanzjarju tistax titlef il-kompetittività. Il-verità hi li hemm taxxi fuq is-servizzi finanzjarji u l-banek kemm f’pajjiżi fi ħdan l-UE, bħalma hija l-Ingilterrra, kif ukoll barra l-UE.
L-UE qiegħda tgħid li b’dak li qed tipproponi se tkun qed tagħti eżempju lid-dinja, u li hija influwenti biżżejjed li jista’ jagħti l-każ li tkun segwita minn ħaddieħor. Dan minħabba l-fatt li ebda Gvern mhu se jgħid le għal xi dħul finanzjarju.
Iqum minnufih il-punt, li jista’ jkun kontroversjali wkoll, dwar fejn għandhom jispiċċaw, x’użu għandu jsir, mill-flus miġburin minn din it-tassazzjoni. Nagħti eżempju mill-aktar reazzjonijiet riċenti li kien hemm: il-Ġermanja taqbel ma’ din it-tassazzjoni, imma ma taqbilx li d-dħul minnha għandu jmur direttament għall-baġit tal-UE, imma jmur fil-baġit nazzjonali tal-pajjiżi membri.
Dan iġibni għall-pożizzjoni ta’ pajjiżna f’dan ir-rigward. Malta jidher li se tkun kontra din it-tassazzjoni. Però naħseb li għandna naraw qabel x’jista’ jkun l-impatt ta’ tassazzjoni bħal din. Veru li għandna servizzi finanzjarji, imma kemm huma kbar? Kemm jista’ jkun ġenerat dħul finanzjarju minnu permezz ta’ din it-tassazzjoni? Żgur li mhux se jkollna d-dħul li jkollha l-Ġermanja jew l-Ingilterra.
X’naqblu li għandu jsir minn dan id-dħul? Imur fil-baġit tal-UE jew f’dak nazzjonali? X’irridu? Irridu li l-baġit tal-UE jiżdied jew li jkun iffriżat bħalma jridu l-Ingliżi? Jekk ikun iffriżat x’ikun ifisser f’dawk li huma għajnuniet, sussidji għal pajjiżna għaċ-ċiklu ta’ seba’ snin li jmiss, 2013/2020? Jekk il-baġit tal-UE jikber u minn dan Malta tkun tista’ tibbenefika, għandna nkunu kontra din it-tassazzjoni?
Nemmen li għandna nevalvaw is-sitwazzjoni mill-punto di vista ta’ Malta kif se jolqotha bħala pajjiż membru tal-Unjoni u mhux għax hekk naħsbu jew għax hekk qegħdin jgħidu. Għandna nevalwaw u naraw jekk hux se niggwadanjaw jew hux se nitilfu. Imbagħad niddeċiedu.