Jekk hemm suġġet li għadu jissemma bi prominenza fil-midja kemm lokali kif ukoll f’dik internazzjonali, huwa dak tal-“Panama Papers”. Jissemmew listi ta’ ismijiet ta’ individwi, ta’ kumpaniji li kellhom jew għandhom investimenti fi prodotti finanzjarji fil-Panama. Jissemmew ukoll professjonisti li jaħdmu fil-qasam finanzjarju, li għenu u fetħu għan-nom ta’ dawn l-individwi u kumpaniji, biex isir investiment fi prodotti finanzjarji ġewwa il-Panama, pajjiż li għalkemm għandu settur finanzjarju bħalma għandu Malta, hemm differenzi fir-regolamentazzjoni taz-zewg pajjizi.
Meta Malta waqqfet is-settur finanzjarju u twaqqfet ukoll l-Awtorita’ Regolatorja ta’ dan is-settur, Malta ma addottat l-ebda prattici ta’ segretezza. Sewfejn jidħol skambju ta’ informazzjoni ma’ pajjiżi oħra Ewropej u pajjiżi oħra fosthom l-Istati Uniti, dwar min jinvesti ġewwa pajjiżna, speċjalment fejn tidħol xi investigazzjoni fuq suspetti ta’ xi attivita’ kriminali ta’ xi individwu jew kumpanija Malta ma zammitx lura milli tikkopera.
L-istess jista’ jingħad għal koperazzjoni fuq l-aspetti ta’ taxxa. Filfatt, din it-trasparenza fl-operat tas-settur finanzjarju tagħna, konna inħaddnuh anki meta’ Malta ma kinietx membru sħiħ tal-Unjoni Ewropeja. Dan kompla jissaħħaħ meta sirna membri tal-Unjoni Ewropeja. Filfatt, Malta diġa’ daħħlet fil-leġiżlazzjoni li hi mgħarufa bħala is-“Savings Directive”, fejn Malta qed tintrabat li tgħaddi, b’mod awtomatiku, informazzjoni lil pajjiżi l-oħra fl-Unjoni fuq qligħ fuq investiment privat ta’ ċittadini ta’ pajjiżi oħra.
Is-settur finanzjarju tal-Panama ma jimxiex ghal kollox fuq dawn il-prinċipji. Il-Panama ghadu jħaddan s-segretezza u ma jgħaddix informazzjoni fuq l-investituri u l-investiment tagħhom lill-pajjiżi oħra. Dan kien li wassal għal dan il-kjass kollhu, wara li ġiet “misruqa” informazzjoni fuq individwi u kumpaniji li kellhom jew għandhom investiment hemmhekk.
B’dak kollhu li qed jingħad fil-medja, qed iqumu bosta mistoqsijiet fuq is-settur finanzjarju ta’ pajjiżna, fosthom: Is-settur finanzjarju tagħna qed jintlaqat ħażin minn din il-problema li tirrigwardja il-Panama? Is-settur taghna għandu minn x’hix jistħi? Is-settur tagħna qed jopera b’mod li mhux xieraq u mhux qed ikun trasparenti fl-operat tiegħu? Is-settur tagħna għandu l-futur tiegħu mċajpar?
Huwa dmir u d-dover tiegħi li inserraħ moħħ kulħadd illi s-settur finanzjarju tagħna m’għandux minn x’hiex jiddejjaq għaliex m’huwiex taħt din il-kappa ta’ segretezza illi għandu dan il-pajjiż tal-Panama.
Mhux hekk biss imma fejn tidħol it-taxxa li kumpaniji u individwi iħallsu, Malta tħaddan sistema ta’ taxxi li hi permessa u approvata mill-istess Unkoni Ewropea.Issa l-fatt li s-sistema ta’ taxxa li naddottaw tagħtina vantaġġ fuq pajjiżi oħra, m’għandux iħammrilna wiċċna jew niddejqu. Kull pajjiż jara kif jagħmel biex ikollu vantaġġ fuq ħaddieħor u jattira investiment lejn pajjiżu. Dan hu il-prinċipju tas-suq ħieles. Sakemm ma jkunx hemm ksur tal-liġijiet, ma jkun hemm xejn illeċitu li jkun qed isir.
Huwa minnu li fl-Unjoni Ewropeja hemm min irid li jkun hemm armoniżżazzjoni tat-taxxi jew li titneħħa il-kompetittivita’ fejn tidħol taxxa.
Is-settur finanzjarju huwa settur bħal dak tal-manifattura, it-turiżmu u oħrajn, setturi li jiġġeneraw ix-xogħol u ġid b’mod leċitu. Kull settur għandu xi aspett li jista’ jagħti lok ta’ abbuż u xi attivita’ kriminali. Nagħti eżempju, il-fabbriki li jipproduċu is-skieken li kull familja tuża fil-ħajja ta’ kuljum, huma konxji li jista’ jkun hemm xi individwu li juża sikkina u joqtol persuna oħra. Allura peress li hemm dan ir-riskju, nieqfu nipproduċu is-skieken? Żgur li ħadd ma jgħaddielu minn moħħu dan il-ħsieb.
L-istess japplika ghas-settur tas-servizzi finanzjarji. Is-settur finanzjarju jkopri attivita’ u joffri servizzi bħal banek, aġenziji tal-assigurazzjoni, u servizzi ta’ intermedjarji illi huma il-mezz li bih individwu jinvesti flusu li jkun faddal mix-xogħol tiegħu. Huwa settur li jħaddem eluf ta’ individwi, persuni li huma it-tfal jew qraba ta’ kull wieħed u waħda minnha. Iktar mal-istituzzjonijiet finanzjarji joħorġu bi prodotti innovattivi u sofistikati, iktar ikunu kompetittivi u produttivi, li jwassal biex ikun hemm aktar ħolqien tax-xogħol.
L-investituri f’dan il-qasam ġejjin minn kull qasam tas-soċjeta’ u kull individwu iħaddan moralita’ u etika diversa. L-istess jista’ jingħad għal min imexxi il-kumpaniji li joffru servizzi finanzjarji.
Huwa għalhekk li Malta rat li jkollha regoli u Awtorita’ li tara li l-istandards f’dan il-qasam ikunu ta’ l-ogħla livell sabiex ir-reputazzjoni tajba ta’ pajjiżna jibqa’ jinżamm sabiex inkomplu nsaħħu u nkabbru dan is-settur ferm importanti għal-ekonomija ta’ Malta.
Malta ser tkompli tikkopera u tiġġieled kull attivita’ illeċita li jista’ jkun hemm f’dan is-settur, liema attivita’ tikkonċerna dik ta’ finanzjament ta’ atti terroristiċi, mafjuża, ħasil ta’ flus, bejgħ ta’ droga u rejati simili.
Malta lesta li ssib kompromess fin-negozjati li ghaddejin fil-Kunsill tal-Ministri filwaqt li tkompli tiddefendi id-dritt tagħha ta’ sovranita’ fuq it-tħaddim tal-metodu ta’ tassazzjoni u il-prinċipju tas-suq ħieles anki fis-settur finanzjarju.
Il-Ġimgħa 27 ta’ Mejju 2016